حوارات ضاحكة

 ابتسامة النصر لعروس فى مرحلة اولي للتحول
( اصيب المصور بجلطة فى قرقوشة الاذن وتوفاه الله فى الحال)
-------------------------------------------------------

دخلت الست طهقانة فجأة وبدون مقدمات

حدفتنى برابط لصفحة عليها فتوى للدكتور عبدالله سمك عن القائمة 

ايوة القايمة اللى بتتكتب لاهل العروسة عشان يكتفوا المأسوف 

على شبابه وحيد القرن قصدى وحيد والديه ومايحاولش يفلفص منهم

 او يخيب ويفكر يطلق بعد اما القردة قصدى العروسة تجيلها الحالة  

و تظهر على حقيقتها وتبان المخالب والخطاطيف

وتتحول بعد الجواز لمرات اونكل الاشكيف اللى جلده كله حراشيف

بعد اما قريت الفتوى قمت بدأت معها الحوار التالى

اللى ما بين الاقواس ده تعليقى فى سرى .......... محدش يفتن بقى

  بشندى

ازيك يا ست احسان

( مش اسمها اصلا ولكن اقتباسا من مسلسل الشهد والدموع )

طهقانة

الحمد لله يا شفيق بيه

( مش عارف جابت الاسم ده من فين انا اسمى احلى من كدة بكتير )

 بشندى

ايه موضوع القايمة ده

( مستغرب انا )

طهقانة

قايمة ايه وقعدة ايه

( الزهايمر اشتغل )

 بشندى

طيب طالما هنعمل فيها عبده العبيط

طهقانة

لا ده لاقيته صدفة

( افتكرت بقى --- حركات )

اصل الشيخ سمك ده دايما يفاجاني بفتاويه

( قال يعنى متابعة الراجل من اول ما دخل الازهر )

بس هو حازم شوية لابيض لاسود

( البنات بيحبوا الاورانج يا عم الشيخ اديها بنى )

وانا اسمع انكم بتجادلوا في فيلم القايمة ده

( على اساس انه السبب فى التسيب اللى فيه البلد )

 بشندى

الجدال على حاجات معينة

يعنى بعض الناس تبالغ فى التقييم

( يعنى من الاخر حرامية يا عم الحاج )

طهقانة

مدفوع فيها فلوس ولا مش مدفوع

( فلوس ايه دول شارين بالقسط )

 بشندى

يشتروا كرسى بخمسة تعريفة وعايزين يكتبوه بالف جنيه

( يا عالم يا طماعة ده غير انه خشب صناديق )

عايزين يضيفوا الحلل والاطباق والكبايات

( عالم معفنة )

طهقانة

دافعين فيها فلوس ديه ولا مش دافعين

( على اساس انهم شارين الاطقم من فرنسا مش من حمام التلات ومقلبين

البياع فى كام طقم كمان )

ولا حد ادهالهم هدية

( هدية ايه هو فيه حد بيعبرهم اصلا يحمدوا ربنا )

  بشندى

مش عارفين انه ممكن يطفشها وتسبلوا حتى هدومها

(ده لو ابن حلال ومابعش الشبكة بعد الجواز بحجة انه هايتسجن بسبب الديون)

طهقانة

مفيناش من الحوارت التعبانه ديه

( دلوقت الحوارات بقت تعبانة )

حقها ولا مش حقها

( لو اسمها روقة يبقى حقها الست غرقت وهى بتساعد جوزها والبحر كان ملتم )

 بشندى

حوارات ايه

طهقانة

ده انتم بشعين

( اكيد الرجالة بشعين ده رأى اصيل لاى ست )

 بشندى

طالما الحق

يبقى اللى يكتب التمن الفعلى

والدهب والحلل والاطباق مش بتتكتب

دى الاصول بقى

طهقانة

اصول مين

 بشندى

اصول القايمة

طهقانة

الحلل والاطباق ديه بفلوس ولا جولها صدقة

( ياريت كانوا صدقة دول سرقة )

 بشندى

الناس اصلها بتتخانق لما يطلب اهل العروسة انهم يكتبوا قايمة اكبر من القيمة الفعلية

( عشان نصابين وبيدبسوا الزبون )

طهقانة

لا احنا بنتكلم علي الفعلي

 بشندى

الفعلى لو العريس يطول يجب كل حاجة ولا يكتبش قايمة كان عملها

طهقانة

بس فعليا بقي هي مخروب بيتها في صيني وكاسات واركوبال وايشي طقم قهوة وكاكاو

( كاكاو ايه دى ماتعرفش شكله اصلا بتجيب على السمع وخلاص )

طهقانة

مايتكتبوش ليه بقي هو استهبال وخلاص

( الم الدور بدل ما تخبطنى بحاجة والا لا )

 بشندى

وهو مخروب بيته فى شقة وتجهزها وعفش وشبكة ومهر وفرح

( يالا بقى العمر واحد والرب واحد )

طهقانة

بلا خيبة بقي

 بشندى

وكفاية ها يعلف الهانم

طهقانة

لا والله

ليه هو كان جايبها من علي باب جامع

 بشندى

ايوة يا بنتى مش لحمة وخضار وفاكهة

طهقانة

ولا كانت مستنية يصرف عليها

 بشندى

دى لو ماكليتش تفضحوا

طهقانة

ربنا يفضحه دنيا واخره

 بشندى

ليه بس بقى ده جزاته

طهقانة

ايه جزاته ديه

 بشندى

جزاؤه بس بالعامية

طهقانة

انت محسسني انه تفضل عليها

 بشندى

اكيد طبعا

مش رحم ابوها وامها من طلعتها البهية

واتدبس هوه

طهقانة

وهم كانوا اشتكوا له

 بشندى

لو طالوا كانوا عملوها وباسوا ايديه كمان انه ها ينجدهم منها

طهقانة

ديه لو قعدت جنبهم مية سنة مش هيسمعولها صوت

واول ماتتجوز صوتها بيطلع

يبقي ايه ده بقي

 بشندى

يبقى كتر الف خيره شوفتى اهو عالجها كمان من الخرس

طهقانة

لا نسمه

وهو عفرتها وركبهاالخفيف

 بشندى

شوفى دفع اد ايه فى علاج العجماء دى

( حلوة عجماء دى اى لا تتحدث العربية بتمأمأ بس )

طهقانة

وياسلام لو جابت عيل بتتجنن وصوتها يسمع كل الجيران

( مين قال انها من الاول عاقلة حد يمصمص شفايفه مش بعرف اعملها ويقول حكم )

 بشندى

هو الجنون اصلا فى جيناتها الوراثية بس كانت بتستهبل

فجأة كأنى سمعت صوت شد اجزاء برغم انها كانت محادثة كتابية

 وحسيت باضطراب الشاشة

قمت قلت بصوت عالى

ايه قمة الاستهبال والتسيب ده هما مقطعوش الكهرباء لحد دلوقت ليه 

ورحت فاصل التيار عن البيت كله

سيمفونية الإثم والسفالة (4)

 يامجلس الرمة

مش هلبس العمة

ملعون ابو الطراطير

لا تقولى دول بشاوات

من قبلهم لواءات

طاروا ولا العصافير

ليه صوتى انا بالذات

يطنشوا البهوات

يرموه كده ف البير

اختارنا قاموا لغوه

دستورنا بيلاعبوه

ده شيئ ولا الاساطير

ووشاح بقى قصة

على ام دى الرصة

ف قلبه مات له ضمير

وبوق وبيهاتى

مجلسكوا ده حياتى

رجع لنا النواطير

نسكت ونتعجب

ده خسارة نتندم

على مسلك الصراصير

سيمفونية الإثم والسفالة (3)

طلبت كدة القافية

كلمات كتير خافية

تكوينها م الممنوع

مخارجها مش صافية

تجلد بسوط مسنون

قضاة تجيب كافية

محامية بالتزعيق

كلامها كله نهيق

لا فكر ولا تفكير

غباء بلا ناهية

جعورة ملو كلام

بلسان كتير فتان

عملولها كام فستان

والبردعة كافية

مادام شورت المدام

والكل كان خدام

ماقولشى والا كمان

اجابتى مش شافية؟؟؟

من غير كتير حكايات

اشمعنى دى بالذات

تدخل على شنبات

ليه ماشية بالعافية

حوارتها بالتسخين

وكلامها كله ثقيل

تفتكروا ليها ضمير

والا صحيح جزمة

نطلنا ف القنوات

وملمعة البيادات

لا صادقة ف مدخلات

ولا حاسة بالأزمة

ياختى على جمالها

طرزان اكيد خالها

لو شفتوا مين جالها

راح تضحك القزة

سيمفونية الإثم والسفالة (2)

سمعنى كدة تانى

فهمنى قصدك ايه

ما الشعب ده الاول 

والا انت عامل بيه

ورينى كدة بطاقتك 

قولى سيادتك مين

صحيح من اياهم 

ساكتين عليك طب ليه

ايامكوا دى سودة

ياما عشتوا ع العوجة

كرامتكوا دى تنداس

قضاكوا يبقى مداس

وصرخوا فيكوا الناس

فضلتوا ف الاوضة

فوقوا يا حبة سيس

ماعدتش بينا شاويش

احكامكوا دى تفصيل

وماشيه ع الموضة

وكمان معاكوا مدام

خربت جتك شوطة

سيمفونية الإثم والسفالة (1)

يا مستشار الهم

دى الدنيا دوارة

لوعند اهلك دم

تهرب فى طيارة

ظلموا بيك القضا

اخرك تكون طارة

شخلل كدة و ظيط

ع الفاضى والمليان

نفسى كدة اشوفك

نازل وفى الميدان

ثوارنا يسعدوا بيك

ياخدوك فى خرارة

تخرج عاقل و رزين

واهو كله يفرح بيك

ومنى هدية ليك

طبلة وزمارة