حبايبنا الغاليين

بصراحة كدة و من غير زعل

منظرنا بقى مش ولابد قدام الناس كسفتونا يا اسمكوا ايه

كويس كده عمايلكوا السودا دى

اعمل فيكوا ايه انا بقى دلوقت

ضيوفنا وعلى ارضنا وبيمدوا ايديهم لنا بكل خير

تولعوا فى مقرهم وترمولهم ورقهم وعفشهم وتحرقوا علمهم 

عيب دة والا مش عيب

وكل يوم واحد يعمل نفسه عنكب ويطلع العمارة يشد الغيارين بتوع السفير ويولع فيهم

واصحابة يعملوا زى الهنود الحمر حواليه

كل ده كان ليه       مع الاعتذار لاونكل عبدالوهاب الله يرحمه

انتو مش سو كيوت       so cute

وشباب نوتى خالص         naughty

والست ام تشيلسى كانت منزعجة خالص وعمو اوباما صحى من النوم معمص  

سحب الشومة وهدد بقطع معونة وعقوبات اقتصادية

ازى يا قلات الذوق وعديمى المسئولية تنزلوا  ليفانون هو والمدام

 واصحابة بالجلاليب فى عز الفجر ويقعدوا اربع ساعات فى المطار

انتوا اتربيتوا على كدة

شوفتوا هما استذوقوا ازاى وعملوا مظاهرات حب لينا قدام سفارتنا عندهم

وده عشان بيحبونا

هما لما قتلوا العساكر ماكنوش واخدين بالهم خلاص حصل خير

هما يا عبابيط بيحبونا من ساعة ديفيد اتشل سمحون لما كان عايش هناك

هما فى الاول كانوا بيكرهوه عشان يهودى زيهم

بس لما اكتشفوا انه جاسوس مصرى بعد اما مات حبونا

كمان جمعة الشوان وجوجو كانت قصة حب سو لافلى    so lovely

وهما عشان بيحبونا قالولنا

حرق الحبيب زى اكل الزبيب

اوعوا تقولوا

دول بيحبوا الزبيب

طب ما نكتر لهم الزبيب الشوية

و عشان يحبونا كمان وكمان

المرة الجاية نولع لهم فى السفير

اياكم تعملوا كدا يا سفاحين

دول حبايبنا الغاليين